ಅಜ್ಜಿಯ ಸೀರೆ
ಅಜ್ಜಿಪೆಟ್ಟಿಗೆಯಲಿ ಇತ್ತೊಂದು ರೇಷಿಮೆ ಸೀರೆ
ಅದರ ತುಂಬೆಲ್ಲ ಅಜ್ಜಿಯ ನೆನಪಿನಾ ಧಾರೆ
ಒಂದೇ ನೋಟದಿ ಕಣ್ಮನವ ಸೆಳೆದಿತ್ತು
ಸ್ಪರ್ಶಿಸಲು ಅದರಲ್ಲಿ ಬೆಣ್ಣೆಯ ನುಣುಪಿತ್ತು

ಅದರಂಚಿನಲ್ಲೋ ನವಿಲಿನ ಚಿತ್ತಾರ
ಸೀರೆಯಳತೆಯೋ ಗಜದ ವಿಸ್ತಾರ
ಸುತ್ತಿ ಮೆರೆಯುವದು ಕಷ್ಟದ ವಿಚಾರ
ಗ್ರಹಿಸಿದರೆನೆ ಹೆದರಿಕೆ ಅದರಲ್ಲಿ ನನ್ನ ಆಕಾರ

ಕತ್ತರಿಸ ಹೋದರೆ ಎದಿರು ಅಜ್ಜಿಮುಖ ಬರುತ್ತಿತ್ತು
ಮಾಡಲೇನೆಂದು  ಪೆಟ್ಟಿಗೆಯಲಿ ಭದ್ರವಾಗಿತ್ತು
ಅಂದು ನೆನಪಾಗಿ ನೋಡಿದರೆ........
ಜಿರಳೆ ಅದರಲ್ಲಿ ಚಿತ್ತಾರ ಬಿಡಿಸಿತ್ತು
ಪಾಪ ಅಜ್ಜಿಯ ಸೀರೆ ಗುಜರಿ ಮಾಲಾಗಿತ್ತು